Il project sa basa sin il studi da basa La diaspora rumantscha en Svizra tudestga che ha demussà il basegn da perscrutaziun en dus champs: 1) l'influenza da new speakers (qvd. persunas che tschantschan rumantsch ma che na han betg emprais rumantsch sco emprima lingua) e da geniturs cun enconuschientschas passivas dal rumantsch sin la pratica linguistica en famiglia e 2) l'influenza dals uffants e la dinamica tranter geniturs e da l'uffant sin las linguas discurridas en famiglia e la confruntaziun cun quellas (Child Agency). Per registrar la situaziun sociolinguistica cumplexa da famiglias rumantschas ordaifer il territori linguistic rumantsch a moda adequata, èsi necessari d'accumpagnar famiglias sur in temp pli lung e da registrar lur pratica linguistica cun agid da differents instruments metodics. Il project sa basa sin in set da metodas qualitativas e participativas che pussibiliteschan da registrar experientschas e motivaziuns ord la perspectiva dals singuls commembers da la famiglia. Il studi sa focusescha sin sis famiglias en Svizra tudestga che vegnan accumpagnadas ed examinadas pli profundamain durant in onn. L'applicaziun da differentas metodas qualitativas permetta da chapir la situaziun linguistica da las famiglias perscrutadas, lur basegns e lur strategias en il contact cun la plurilinguitad e la voluntad da dar vinavant il rumantsch.
Il project less contribuir a la perscrutaziun da basa sociolinguistica sur las persunas che discurran rumantsch ordaifer il territori linguistic tradiziunal. Ils resultats da quests dus champs da perscrutaziun (Child Agency e New Speakers) porschan ina basa necessaria per la politica e per las organisaziuns linguisticas, sin ils quals ins po sviluppar mesiras da promoziun effectivas per la lingua. Il caracter exemplaric dal studi na permetta betg mo da far ina perscrutaziun da basa davart il rumantsch, mabain er davart la dinamica da la lingua da famiglia en autras linguas minoritaras. Il barat metodic e tematic davart la "Family Language Policy" cun autras instituziuns che fan retschertgas en contexts sumegliants è d'impurtanza per la perscrutaziun ed il svilup da metodas en il sectur da contexts da minoritads ed en general per la perscrutaziun davart la dinamica da la lingua da famiglia. La colliaziun internaziunala prendida en mira duai esser fritgaivla per il context da perscrutaziun en Svizra.