Il post da documentaziun dal center da cumpetenza documentescha la perscrutaziun scientifica davart la plurilinguitad, en spezial en connex cun las quatter linguas naziunalas da la Svizra. Nus ramassain e rendain accessiblas medias digitalas e fisicas davart quel tema. Latiers tutgan:
- cudeschs
- revistas
- funtaunas en l'internet
- litteratura grischa
- rapports da pressa, emissiuns da radio e televisiun
- agens rapports da perscrutaziun ed ulteriuras publicaziuns dal center da cumpetenza
Noss inventari fisic che stat a disposiziun a scienziadas e scienziads sco er a la publicitad interessada po vegnir retschertgà via il sistem bibliotecar da la Biblioteca chantunala ed universitara da Friburg e sa chatta en las localitads da la Biblioteca da las linguas estras e da la plurilinguitad da l'Universitad da Friburg. Nossa purschida digitala chattais Vus en noss portal-web plurilinguitad.
Il post da documentaziun maina in servetsch d'infurmaziun online, al qual mintgina e mintgin po s'adressar en cas da dumondas en connex cun la plurilinguitad en Svizra. Nus ans occupain gugent da Vossa dumonda en tudestg, franzos, talian u englais.
En il rom da nossa incumbensa da documentaziun publitgain nus plinavant mintg'onn ina «Bibliografia da la perscrutaziun svizra davart la plurilinguitad» che ramassa publicaziuns scientificas svizras areguard quel tema e che las renda accessiblas en quatter linguas.
Contact
Vus cuntanschais la direcziun dal post da documentaziun:
- via e-mail moritz.sommet@unifr.ch
- via telefon +41 26 300 71 46 (ma, me, ve)
- directamain en nossa biblioteca a la Rue du Criblet 13, CH-1700 Friburg
Il portal-web plurilinguitad porscha in svelt access a las purschidas digitalas las pli impurtantas dal center da cumpetenza. Qua chattais Vus:
- il guid-web plurilinguitad – ina selecziun da passa 300 adressas d'internet en connex cun plurilinguitad e l'acquisiziun da linguas
- la bibliografia online che vegn actualisada cuntinuadamain davart la perscrutaziun scientifica da la plurilinguitad en Svizra
- l'archiv da datas da perscrutaziun dal center da cumpetenza cun infurmaziuns e datas davart noss projects da perscrutaziun
Ulteriuras purschidas èn planisadas.
La Biblioteca da las linguas estras e da la plurilinguitad (BLE) da l'Universitad da Friburg ramassa e renda accessiblas resursas en connex cun la plurilinguitad.
Homepage da la BLE